ଶ୍ରୀନଗର: ଜମ୍ମୁକଶ୍ମୀରର ବାନ୍ଦିପୋରା ଜିଲ୍ଲାରୁ ଦୁଇଜଣ ହାଇବ୍ରିଡ ଆତଙ୍କବାଦୀଙ୍କୁ ଗିରଫ କରାଯାଇଛି। ରବିବାର ଦିନ ପୁଲିସ କହିଛି ଯେ ଏହି ଆତଙ୍କବାଦୀଙ୍କ ନିକଟରୁ ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ସାମଗ୍ରୀ ମଧ୍ୟ ଉଦ୍ଧାର କରାଯାଇଛି। କୁହାଯାଉଛି ଯେ ଏହି ଆତଙ୍କବାଦୀମାନେ ହିଜବୁଲ ମୁଜାହିଦ୍ଦିନ ସହ ଜଡିତ ଅଛନ୍ତି। ପୁଲିସ୍ ଅଧିକାରୀ କହିଛନ୍ତି ଯେ ଏହି ଆତଙ୍କବାଦୀମାନେ ବାନ୍ଦିପୋରା ଠାରୁ ଶ୍ରୀନଗରକୁ ଯାଉଥିଲେ। ଆଉ ଗୁଇନ୍ଦା ସୂଚନା ମିଳିବା ପରେ ସୁରକ୍ଷାବାହିନୀ ଏମାନଙ୍କୁ ଗିରଫ କରିଥିଲେ। ଗିରଫ ହାଇବ୍ରିଡ ଆତଙ୍କବାଦୀମାନେ ଆବିଦ୍ ଅଲି ଏବଂ ଫୈଜଲ ହାସନ ବୋଲି ଜଣାପଡିଛି।
ଉଭୟ ଲୋକ ପୁଲୱାମାର ହର୍ପୋରାର ବାସିନ୍ଦା ହୋଇଥିବାବେଳେ ଉଭୟଙ୍କ ପାଖରୁ ଏକେ-୪୭ ରାଇଫଲ ସମେତ ବହୁ ସଂଖ୍ୟକ ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ସାମଗ୍ରୀ ଉଦ୍ଧାର କରାଯାଇଥିଲା। ସେମାନଙ୍କ କାରରୁ ଦୁଇଟି ମାଗାଜିନ୍, ପିସ୍ତଲ ଏବଂ କିଛି ଜୀବନ୍ତ କାର୍ଟ୍ରିଜ୍ ମିଳିଥିଲା । ହାଇବ୍ରିଡ ଆତଙ୍କବାଦୀଙ୍କ ଦ୍ୱାରା ବ୍ୟବହୃତ ହେଉଥିବା କାରକୁ ମଧ୍ୟ ପୁଲିସ ଜବତ କରିଛି। ସେମାନଙ୍କ ବିରୋଧରେ ଏକ ମାମଲା ରୁଜୁ ହୋଇଛି ଏବଂ ତଦନ୍ତ ଚାଲିଛି।
ହାଇବ୍ରିଡ ଆତଙ୍କବାଦୀ କାହାକୁ କୁହାଯାଏ?
ହାଇବ୍ରିଡ ଆତଙ୍କବାଦୀଙ୍କ ବାବଦରେ ପୁଲିସ ଅଧିକାରୀ କହିଛନ୍ତି ଯେ ଏହି ଆତଙ୍କବାଦୀମାନେ ପେସାଦାର ଆତଙ୍କବାଦୀଙ୍କ ପରି ନୁହଁନ୍ତି ଯେଉଁମାନେ ଆତ୍ମଘାତୀ ବିସ୍ଫୋରଣ କରିବାକୁ ମଧ୍ୟ ପ୍ରସ୍ତୁତ ହୋଇଥାନ୍ତି । କିନ୍ତୁ ଏହି ହାଇବ୍ରିଡ୍ ଆତଙ୍କବାଦୀମାନେ ସେମାନଙ୍କ ହ୍ୟାଣ୍ଡେଲରଙ୍କ ନିର୍ଦ୍ଦେଶ ପାଇବାରେ କୌଣସି ସ୍ଥାନରେ ବିସ୍ଫୋରଣ କରିଥାନ୍ତି ଏବଂ ତା’ପରେ ସେମାନଙ୍କର ସାଧାରଣ ଜୀବନକୁ ଫେରିଯାଆନ୍ତି । ଏହା ପରେ ପରବର୍ତ୍ତୀ କାର୍ଯ୍ୟ ପାଇଁ ହ୍ୟାଣ୍ଡେଲରଙ୍କ ନିର୍ଦ୍ଦେଶକୁ ଅପେକ୍ଷା କରିଥାନ୍ତି । ଏମାନଙ୍କୁ ଧରିବା କଷ୍ଟକର ହୋଇଥାଏ, କାରଣ ସେମାନେ ଏକ ସାଧାରଣ ନାଗରିକ ପରି ଜୀବନଯାପନ କରନ୍ତି ।
