ମୁମ୍ବାଇ: ଆଇନ୍ଗତ ସମସ୍ୟାରେ ପ୍ରାୟତଃ ଅଧିକାଂଶ ସମୟରେ ଛନ୍ଦି ହୋଇପଡ଼ିଥାନ୍ତି ଅଭିନେତା ସଲମାନ ଖାନ୍। ନିକଟରେ ସେ ପୁଣି ଥରେ ଏକ ମାମଲାରେ ଛନ୍ଦି ହୋଇ ପଡ଼ିଛନ୍ତିି। ଜାଣିବାକୁ ମିଳିଛି ଯେ ସଲମାନ ରାସ୍ତାରେ ଯାଉଥିବା ଅବସ୍ଥାରେ ଜଣେ ଟିଭି ସାମ୍ବାଦିକ ତାଙ୍କ ଫଟୋ ଉଠାଇବାରୁ ସଲମାନ ତାଙ୍କୁ ଦୁର୍ବ୍ୟବହାର ଦେଖାଇ ଥିବାରୁ ଅନ୍ଧେରୀ କୋର୍ଟ ତାଙ୍କ ନାଁରେ ଏକ ସମନ ଜାରି କରିଛି। ସଲମାନ ଏବଂ ତାଙ୍କ ଅଙ୍ଗରକ୍ଷୀ ମହମ୍ମଦ ନୱାଜ ଇକବାଲ୍ ଶୈଖ୍ଙ୍କୁ ଏପ୍ରିଲ୍ ୫ ତାରିଖ ପୂର୍ବରୁ ଅଦାଲତରେ ହାଜିର ହେବାରୁ ନିର୍ଦ୍ଦେଶ ଦେଇଛନ୍ତି ଅନ୍ଧେରୀ ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ କୋର୍ଟ।
ଉଭୟ ସଲମାନ ଏବଂ ତାଙ୍କ ଅଙ୍ଗରକ୍ଷୀଙ୍କୁ ୫୦୪ ଓ ୫୦୬ ଧାରା ଅଧୀନରେ ସମନ ପଠାଯାଇଛି। ଘଟଣାଟି ହେଉଛି ୨୦୧୯ ମସିହାର। ଜଣେ ଟିଭି ସମ୍ବାଦିକ ଅଭିଯୋଗ ଆଣିଛନ୍ତି ଯେ ୨୦୧୯ ମସିହାରେ ସେ ତାଙ୍କ କାର୍ଯ୍ୟ କରୁଥିବା ବେଳେ ସଲମାନ ଓ ସଲମାନଙ୍କ ଅଙ୍ଗରକ୍ଷୀ ତାଙ୍କୁ ଅପମାନିତ କରିବା ସହ ଧମକ ମଧ୍ୟ ଦେଇଥିଲେ। ଏ ନେଇ ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ ଆର୍ ଆର୍ ଖାନ୍ କହିଛନ୍ତି, ‘ଏହି ମାମଲାର ତଦନ୍ତ ପାଇଁ ଏହାକୁ ଡିଏନ୍ ନଗର ପୁଲିସ୍ ଷ୍ଟେସନ୍କୁ ସ୍ଥାନାନ୍ତର କରାଯାଇଛି।’
