ନୂଆଦିଲ୍ଲୀ: ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥଙ୍କୁ ହତ୍ୟା ଧମକ ଦେଇଥିବା ବ୍ୟକ୍ତିକୁ ଗିରଫ କରିଛି ଲକ୍ଷ୍ନୌ ସାଇବାର ପୁଲିସ। ରାଜସ୍ଥାନର ମେୱାତରୁ ତାକୁ ଗିରଫ କରାଯାଇଛି। ଅଭିଯୁକ୍ତର ନାଁ ସରଫରାଜ ବୋଲି ଜଣାପଡ଼ିଛି। ସୋମବାର ଅର୍ଥାତ୍ ଅଗଷ୍ଟ ୮ରେ ଉତ୍ତର ପ୍ରଦେଶ ପୁଲିସର ଟେକ୍ସଟ୍ ହେଲ୍ପ ଲାଇନ ନମ୍ବର ୧୧୨କୁ ଏକ ହ୍ୱାଟ୍ସଆପ୍ ମେସେଜ୍ ଆସିଥିଲା। ଏହି ମେସେଜ୍ରେ ଯୋଗୀଙ୍କୁ ହତ୍ୟା କରିବାକୁ ଧମକ ଦିଆଯାଇଥିଲା। ଏହାପରେ ମୁଖ୍ୟାଳୟ ଷ୍ଟେସନ କମାଣ୍ଡର ସୁଭାଷ କୁମାର ଶୁଶାନ୍ତ ଗଲ୍ଫ ସିଟି ପୁଲିସ ଷ୍ଟେସନରେ ଅଭିଯୋଗ କରିଥିଲେ। ଏନେଇ ଉତ୍ତର ପ୍ରଦେଶ ପୁଲିସ ଶନିବାର ମାମଲା ରୁଜୁ କରି ତଦନ୍ତ ଚଳାଇଥିଲା।
ତେବେ ଏଇ ଗୋଟିଏ ନୁହେଁ ଯୋଗୀ ଆଦିତ୍ୟ ନାଥଙ୍କୁ ହତ୍ୟା କରିବାକୁ ଆଉ ଏକ ଧମକ ମଧ୍ୟ ମିଳିଛି। ସଲମାନ ସିଦ୍ଦିକି ନାମକ ଜଣେ ବ୍ୟକ୍ତି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥଙ୍କ ସମେତ ଭାରତୀୟ କୃଷକ ମଞ୍ଚରର ଜାତୀୟ ସଭାପତି ଏବଂ ପିଆଇଏଲ୍ କାର୍ଯ୍ୟକର୍ତ୍ତା ଦେବେନ୍ଦ୍ର ତିୱାରୀଙ୍କୁ ହତ୍ୟା ଧମକ ଦେଇଛି। ଏହି ଘଟଣା ପରେ ପୁଲିସ ସଲମାନ ନାଁରେ ମାମଲା ରୁଜୁ କରିଛି। ଲକ୍ଷ୍ନୌରେ ଥିବା ଦେବେନ୍ଦ୍ର ତିୱାରୀଙ୍କ ଘରକୁ ଏଭଳି ଏକ ଧମକପୂର୍ଣ୍ଣ ଚିଠି ମିଳିଥିଲା। ଚିଠିରେ ତାଙ୍କୁ ଓ ଯୋଗୀ ଆଦିତ୍ୟ ନାଥଙ୍କୁ ବମ୍ ଲଗେଇ ଉଡ଼ାଇ ଦେବାକୁ ଧମକ ଦିଆଯାଇଛି।
ରାଜ୍ୟରେ କଂସେଇଖାନା ସମ୍ପର୍କିତ ଏହି ଚିଠିଟି ଆସିଥିବା କୁହାଯାଉଛି। କାରଣ ନିକଟରେ ତିୱାରୀ ରାଜ୍ୟରେ ବେଆଇନ କଂସେଇଖାନା ଖୋଲିବାକୁ ବିରୋଧ କରି କୋର୍ଟରେ ଏକ ଜନସ୍ୱାର୍ଥ ମାମଲା ଦାୟର କରିଥିଲେ। ଏହି ଘଟଣାକୁ କେନ୍ଦ୍ର କରି ଧମକପୂର୍ଣ୍ଣ ଚିଠି ଆସିଥିବା କୁହାଯାଉଛି। ତେବେ ଧମକପୂର୍ଣ୍ଣ ଚିଠି ମିଳିବା ପରେ ପୁଲିସ ତୁରନ୍ତ ଘଟଣାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଛି। ତେବେ ସଲମାନକୁ ଏପର୍ଯ୍ୟନ୍ତ ଗିରଫ କରିପାରିନି ପୁଲିସ।
