ଡେସ୍କ: ପଞ୍ଜାବୀ ଗାୟକ ତଥା କଂଗ୍ରେସ ନେତା ସିଦ୍ଧୁ ମୋଜେ ୱାଲାଙ୍କ ହତ୍ୟାରେ ଲିପ୍ତ ସୁଟରଙ୍କୁ ସହାୟତା ଯୋଗାଇବା, ଆଶ୍ରୟ ଦେବା ଓ ହତ୍ୟା ପୂର୍ବରୁ ସୂଚନା ଯୋଗାଇବା ଅଭିଯୋଗରେ ପଞ୍ଜାବ ପୁଲିସ ୮ ଜଣଙ୍କୁ ଗିରଫ କରିଛି। ପଞ୍ଜାବ ସୂଚନା ଏବଂ ଜନସମ୍ପର୍କ ବିଭାଗ ଦ୍ୱାରା ଜାରି ଏକ ବିବୃତ୍ତି ଅନୁଯାୟୀ ମୋଜେ ୱାଲାଙ୍କ ଦେହରେ ୧୯ଟି ଗୁଳି ଲାଗିଛି ଏବଂ ଗୁଳି ବିନିମୟର ୧୫ ମିନିଟ ମଧ୍ୟରେ ତାଙ୍କର ମୃତ୍ୟୁ ଘଟିଛି।
ମୋଜେ ୱାଲା ମେ ୨୯ରେ ଅପରାହ୍ନ ୪.୩୦ ମିନିଟ ସମୟରେ ତାଙ୍କ ଘରୁ ପଡୋଶୀ ଗୁରୁବିନ୍ଦର ସିଂ ଏବଂ ସମ୍ପର୍କୀୟ ଗୁରୁପ୍ରୀତ ସିଂଙ୍କ ସହ ବାହାରିଥିଲେ ଓ ସେହି ସମୟରେ କିଛି ଅଜ୍ଞାତ ବ୍ୟକ୍ତି ତାଙ୍କୁ ଗୁଳି କରି ହତ୍ୟା କରିଥିବା କୁହାଯାଇଛି। ସୂଚନାନୁସାରେ, ଗିରଫ ହୋଇଥିବା ବ୍ୟକ୍ତିମାନେ ହରିୟାଣା ସିର୍ସାର ସନ୍ଦୀପ ସିଂ (କେକଡା), ବଠିଣ୍ଡା ତଲୱାଣ୍ଡି ସାବୋର ମନପ୍ରୀତ ସିଂ (ମାନ୍ନା), ଫରୀଦକୋଟର ମନପ୍ରୀତ ଭାଉ, ଅମୃତସରର ସରାଜ ମିଣ୍ଟୁ, ହରିୟାଣା ତଖତ ମଲର ପ୍ରଭଦୀପ ସିଦ୍ଧୁ (ପବି), ହରିୟାଣା ସୋନେପତର ମୋନୁ ଡଗର ଓ ଫତେହାବାଦର ପବନ ବିଷ୍ଣୋଇ ଏବଂ ନସିବ।
ଏହି ଅପରାଧରେ ସମ୍ପୃକ୍ତ ୪ ଜଣ ସୁଟରଙ୍କୁ ମଧ୍ୟ ପୁଲିସ ଚିହ୍ନଟ କରିଥିବା ଜଣାପଡିଛି। ଗୋଲ୍ଡି ବ୍ରାର ଏବଂ ସଚିନ ଥାପନଙ୍କ ନିର୍ଦ୍ଦେଶରେ କେକଡା ନିଜକୁ ପ୍ରଶଂସକ ବୋଲି ଦର୍ଶାଇ ଗାୟକଙ୍କ ଗତିବିଧି ଉପରେ ନଜର ରଖୁଥିଲା। ହତ୍ୟାକାଣ୍ଡର କିଛି ମିନିଟ୍ ପୂର୍ବରୁ ସେ ମଧ୍ୟ ଗାୟକଙ୍କ ସହ ସେଲ୍ଫି ନେଇଥିବା ଜଣାପଡିଛି।
