ବାଲେଶ୍ୱର: ଯାତ୍ରା ଦେଖାରୁ ଶେଷ ଯାତ୍ରା । କାଳ ହେଲା ଯାତ୍ରା ଦେଖିବାକୁ ଯିବାର ଇଛା । ଯାତ୍ରା ଦେଖି ଯିବା ବାଟରେ ଛକିଥିଲା ମୃତ୍ୟୁ । ଅଜଣା ଗାଡ଼ି ଧକ୍କାରେ ଆଖି ବୁଜିଲେ ୨ ନାବାଳକ । ବାଲେଶ୍ୱର ଜିଲ୍ଲା ସୋର ନିକଟ ନଦୀଗାଁ ଛକରେ ଗତକାଲି ରାତିରେ ଏଭଳି ହୃଦୟ ବିଦାରକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ମୃତକମାନେ ହେଲେ କାନପୁର ଗାଁର ୧୩ ବର୍ଷୀୟ ସୁକୁଟା ସିଂ ଓ ୧୭ ବର୍ଷୀୟ ଚକଡ଼ ସିଂ ।
ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଦୁଇ ନାବାଳକ ଯାତ୍ରା ଦେଖିବାକୁ ଏକ ବାଇକ୍ରେ ଯାଇଥିଲେ। ବାଟରେ ସେମାନଙ୍କୁ ଏକ ଅଜଣା ଗାଡ଼ି ଧକ୍କା ଦେଇଥିଲା । ୨ ଜଣ ରାସ୍ତାକଡ଼କୁ ଛିଟିକି ପଡ଼ିଥିଲେ । ଆଜି ସକାଳେ ସ୍ଥାନୀୟ ଲୋକ ରାସ୍ତାକଡ଼ରେ ମୃତଦେହ ପଡ଼ିଥିବା ଦେଖି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପୁଲିସ ପହଞ୍ଚି ତଦନ୍ତ କରୁଛି । ଦୁର୍ଘଟଣାଗ୍ରସ୍ତ ବାଇକ୍ଟି ରାସ୍ତା କଡ଼ରେ ଚୂରମାର ହୋଇ ପଡ଼ିଥିବା ବେଳେ ଦୁର୍ଘଟଣା ଘଟାଇଥିବା ଗାଡ଼ି ସମ୍ପର୍କରେ କିଛି ସୂଚନା ମିଳିପାରିନି। ୨ ନାବାଳକଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ଗାଁରେ ଶୋକର ଛାୟା ଖେଳି ଯାଇଛି।
