ନୂଆଦିଲ୍ଲୀ: ଦୀର୍ଘ ୩୨ ଦିନ ହେଲା ଋଷ ଓ ୟୁକ୍ରେନ ମଧ୍ୟରେ ଜାରି ରହିଛି ଭୟଙ୍କର ଯୁଦ୍ଧ । ମିସାଇଲ ମାଡରେ ଛୀନଛତ୍ର ୟୁକ୍ରେନ । ନାନା କଟକଣା ଲାଗିବା ସତ୍ତ୍ୱେ ବି ଋଷ ଆକ୍ରମଣରୁ ହଟୁନାହିଁ । ଏହାମଧ୍ୟରେ ଶନିବାର ଆମେରିକା ରାଷ୍ଟ୍ରପତି ଜୋ ବାଇଡେନ୍ ମସ୍କୋ ବସ୍ ଭ୍ଲାଦିମିର ପୁଟିନଙ୍କ ଉପରେ ବର୍ଷିଛନ୍ତି । ବାଇଡେନ୍ ଆହୁରି କହିଛନ୍ତି ଯେ, ବିଶ୍ୱ ଏକ ବଡ ଯୁଦ୍ଧ ପାଇଁ ପ୍ରସ୍ତୁତ ରହିବା ଆବଶ୍ୟକ । ପୁଟିନ ଅଧିକ ଦିନ ନିଜର ଆଧିପତ୍ୟ ଜାହିର କରିପାରିବେ ନାହିଁ । ଏହା ଋଷ ପାଇଁ ଏକ ବଡ ବିଫଳତା କହିଲେ ଅତ୍ୟୁକ୍ତି ହେବ ନାହିଁ । ନାଟୋ ସୀମାର ଏକ ଇଞ୍ଚ ଜାଗା ଉପରେ ବି ଆଖି ନପକାଇବା ଲାଗି ପୁଟିନଙ୍କୁ ଚେତାବନୀ ଦେଇଛନ୍ତି ବାଇଡେନ । ଯଦି ପୁଚିନ ନାଟୋ ଦେଶ ସୀମାରେ ପଶିବାକୁ ଚେଷ୍ଟା କରନ୍ତି ତେବେ ସେ ରକ୍ଷା ପାଇବେନି । ନାଟୋ ଦେଶକୁ ଅକ୍ତିଆର କରିବା କଥା ପୁଟିନ ଭୁଲିଯିବା ଦରକାର । ଏହାସହ ଋଷ ନାଗରିକ ତାଙ୍କ ଶତ୍ରୁ ନୁହେଁ ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ୍ କହିଛନ୍ତି ।
