ନୂଆଦିଲ୍ଲୀ : ପ୍ରଶାନ୍ତ ନୀଲଙ୍କ ନିର୍ଦ୍ଦେଶିତ ଫିଲ୍ମ ‘କେଜିଏଫ୍ ୨’ ବକ୍ସ ଅଫିସରେ କମାଲ କରିଛି। ଫିଲ୍ମରେ ସୁପରଷ୍ଟାର ୟଶଙ୍କ ଜବରଦସ୍ତ ଆକ୍ସନ୍ ଦେଖି ଫ୍ୟାନ୍ସଙ୍କ ଖୁସିର ସୀମା ନାହିଁ। ଏହି ଆକ୍ସନ୍ ଫିଲ୍ମର ପ୍ରଥମ ଭାଗ ୨୦୧୮ ରେ ରିଲିଜ୍ ହୋଇଥିଲା ଏବଂ ସେହି ଦିନଠାରୁ ଫ୍ୟାନ୍ସ ଏହାର ଦ୍ୱିତୀୟ ଭାଗକୁ ଅପେକ୍ଷା କରିଥିଲେ। ଫିଲ୍ମଟି ଚାରି ଦିନ ମଧ୍ୟରେ ୫୦୦ କୋଟି ଟଙ୍କା ରୋଜଗାର କରିଛି।
୨୦୧୮ ରେ ରିଲିଜ୍ ହୋଇଥିବା ଫିଲ୍ମ ‘କେଜିଏଫ୍’ ପରେ ୟଶଙ୍କ ଲୋକପ୍ରିୟତାର ବଢିବାରେ ଲାଗିଲା। କେଜିଏଫ୍ ରିଲିଜ୍ ହେବା ପରେ ୟଶଙ୍କୁ ପ୍ରକୃତ ସ୍ୱୀକୃତି ମିଳିଛି ବୋଲି କହିବା ଭୁଲ୍ ହେବ ନାହିଁ। ୟଶ ବର୍ତ୍ତମାନ ସାଉଥ ସିନେମାର ସବୁଠାରୁ ଦାମୀ ଷ୍ଟାରଙ୍କ ମଧ୍ୟରୁ ଜଣେ। ସେ ଗୋଟିଏ ଫିଲ୍ମ ପାଇଁ ୨୦ କୋଟି ଟଙ୍କା ଚାର୍ଜ କରୁଛନ୍ତି। ତେବେ ‘କେଜିଏଫ୍ ୨’ ପାଇଁ ସେ ୨୭ କୋଟି ଟଙ୍କା ନେଇଛନ୍ତି ବୋଲି କୁହାଯାଉଛି।
ୟଶ ଏକ ମଧ୍ୟବିତ୍ତ ପରିବାରରୁ ଆସିଛନ୍ତି ଏବଂ ତାଙ୍କ ବାପା କର୍ଣ୍ଣାଟକ ଷ୍ଟେଟ ରୋଡୱେ ବସ୍ ଚଳାଉଥିଲେ। ୟଶଙ୍କ ପରିବାର ଚାହୁଁଥିଲେ ସେ ପାଠ ପଢି ଚାକିରି କରନ୍ତୁ। କିନ୍ତୁ ୟଶ ପିଲାଦିନରୁ ଜଣେ ଅଭିନେତା ହେବାକୁ ସ୍ୱପ୍ନ ଦେଖିଥିଲେ। ପରିବାରର ଇଚ୍ଛା ବିରୁଦ୍ଧରେ ୟଶ ଗ୍ଲାମର କ୍ଷେତ୍ର ବାଛିଥିଲେ ଏବଂ ଆଜି ସେ ଇଣ୍ଡଷ୍ଟ୍ରିର ବଡ ଷ୍ଟାରଙ୍କ ମଧ୍ୟରେ ଗଣିତ ହେଉଛନ୍ତି।
