ମୁମ୍ବାଇ, ୨୧ା୧୦: ବଲିଉଡର ବାଦଶାହଙ୍କ ଆଲିସାନ ବଙ୍ଗଲା ମନ୍ନତରେ ପଶିଲା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନସିବି) । କ୍ରୁଜ୍ ଡ୍ରଗ୍ସ ମାମଲାରେ ଗିରଫ ହୋଇ ଦୀର୍ଘ ଦିନ ହେବ ଜେଲ୍ରେ ଥିବା ଶାହାରୁଖ ଖାନଙ୍କ ପୁଅ ଆରୟନଙ୍କୁ ଭେଟି ଘରକୁ ଯିବା ପରେ ଏନସିବିର ଏକ ଟିମ ତାଙ୍କ ଘରେ ପହଞ୍ଚି ଅଧିକ ତଦନ୍ତ କରୁଥିବା ସାମ୍ନାକୁ ଆସିଛି। ଏଥିସହ ଏନସିବି ଅଧିକାରୀ ତନ୍ନ ତନ୍ନ କରି ମନ୍ନତକୁ ଯାଞ୍ଚ କରୁଥିବା ଜଣାଯାଇଛି।
ଅନ୍ୟପକ୍ଷରେ, ମ୍ବାଇ କ୍ରୁଜ ଡ୍ରଗ୍ସ ପାର୍ଟି ଏବେ ଷ୍ଟାର କିଡଙ୍କ ପାଇଁ ମହଙ୍ଗା ପଡ଼ିଛି। ଶାହାରୁଖ ଖାନଙ୍କ ପୁଅ ଆରୟନଙ୍କ ପରେ ଏବେ ବଲିଉଡ ଅଭିନେତ୍ରୀ ଅନନ୍ୟା ପାଣ୍ଡେଙ୍କ ଘରେ ପହଞ୍ଚିଛି ଏନସିବି। ମୁମ୍ବାଇ କ୍ରୁଜ ଡ୍ରଗ୍ସ ପାର୍ଟି ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତଙ୍କଠାରୁ କିଛି ସୂଚନା ପାଇ ଏହାର ସତ୍ୟାସତ୍ୟ ଜାଣିବା ପାଇଁ ଅନନ୍ୟାଙ୍କୁ ସମନ ପଠାଇଛି ଏନସିବି। ଏହା ସହ ତାଙ୍କୁ ଆଜି ଦିନ ୨ଟାରେ ପଚରାଉଚରା ପାଇଁ ହାଜର ହେବାକୁ କୁହାଯାଇଛି।
