ଅକ୍ଟୋବର ୨୭
ପାକିସ୍ତାନର ପୂର୍ବତନ ପେସ୍ ବୋଲର ଶୋଏବ ଅଖତର ଉପସ୍ଥାପକ ନାଉମାନ ନିଆଜଙ୍କ ସହ ମତଭେଦ ପରେ ପିଟିଭିରେ ଲାଇଭ ସୋରୁ ହଠାତ ବାହାରି ଯାଇ ବିବାଦର ଘେରକୁ ଚାଲି ଆସିଛନ୍ତି I
ପରେ ସେ ସୋସିଆଲ ମିଡିଆରେ ଏକ ଭିଡିଓ ପୋଷ୍ଟ କରି ସେ କହିଥିଲେ ଯେ ‘ସେ ଜଣେ ଜାତୀୟ ତାରକା-ତେଣୁ ସେ ସମ୍ମାନର ଯୋଗ୍ୟ’।
ଆଇସିସି ଟି -20 ବିଶ୍ୱକପ୍ରେ ବାବର ଆଜାମଙ୍କ ନେତୃତ୍ୱାଧୀନ ଦଳର ପ୍ରଦର୍ଶନ ନେଇ ପିଟିଭିରେ ଲାଇଭ ସୋ ଚାଲିଥିଲା I ରାୱଲପିଣ୍ଡି ଏକ୍ସପ୍ରେସ ନାମରେ ନାମିତ ଅଖତର ସହ ଏହି ସୋ ରେ ୱେଷ୍ଟଇଣ୍ଡିଜ୍ର ଭିଭିଆନ୍ ରିଚାର୍ଡସ ଏବଂ ଇଂଲଣ୍ଡର ଡେଭିଡ ଗୋୱାରଙ୍କ ଭଳି ବ୍ୟକ୍ତିତ୍ୱ ଭାଗ ନେଇଥିଲେ I
ପେସ୍ ବୋଲର ଶାହିନ୍ ଆଫ୍ରିଦି ଏବଂ ହରିସ୍ ରାଫଙ୍କ ପ୍ରଦର୍ଶନ ଉପରେ ଆଲୋଚନା ହେଉଥିଲା I ଅଖତର କିଛି କହୁଥିବା ବେଳେ ଉପସ୍ଥାପକ ନିଆଜ ମଝିରେ ତାଙ୍କୁ ଅଟକାଇଥିଲେ I ଏହି ଘଟଣାରେ ସେ ନିଜର ଅସନ୍ତୋଷ ବ୍ୟକ୍ତ କରିଥିଲେ I
ଉପସ୍ଥାପକ ନାଉମାନ ନିଆଜ ଅଖତର ଙ୍କୁ କହିଥିଲେ, ‘ତୁମେ ଟିକେ ରୁକ୍ଷ ଭାବରେ କହୁଛ I ଯଦି ଚାହଁ ତୁମେ ଏ ସୋ ଛାଡି ମଝିରୁ ମଧ୍ୟ ଚାଲିଯାଇ ପାରିବ I ‘
ପରେ, ଅଖତର ଟ୍ୱିଟ୍ କରି ଏକ ଭିଡିଓ ପୋଷ୍ଟ କରି କହିଛନ୍ତି ଯେ’ ନିଆଜ ଙ୍କ ବ୍ୟବହାର ପାଇଁ ସେ ସୋ ଛାଡିଛନ୍ତି I ପୁଣି ଟ୍ୱିଟ କରି ସେ କହିଲେ, ସୋସିଆଲ ମିଡିଆରେ ଏକାଧିକ କ୍ଲିପ୍ ପ୍ରସାରିତ ହେଉଛି, ତେଣୁ ମୁଁ ଭାବିଲି ମୁଁ ସ୍ପଷ୍ଟ କରିବା ଉଚିତ୍।
ନାଉମାନ ନିଆଜ ମତେ ଖରାପ ବ୍ୟବହାର କରିଥିଲେ ଏବଂ ସେ ମୋତେ ସୋ ଛାଡିବାକୁ କହିଥିଲେ I
ଏହା ମତେ ଖୁବ ଅଡୁଆରେ ପକାଇଥିଲା I କାରଣ ସେହି ସୋ ରେ ସାର୍ ଭିଭିଆନ୍ ରିଚାର୍ଡସ ଏବଂ ଡେଭିଡ ଗୋୱାରଙ୍କ ଭଳି କିମ୍ବଦନ୍ତୀ ଙ୍କ ସହ ମୋ ସମସାମୟିକ ଖେଳାଳି ମଧ୍ୟ ଭାଗ ନେଇଥିଲେ I ତାଙ୍କ ସମ୍ମୁଖରେ, ଏ ସବୁ ମତେ ଠିକ ଲାଗି ନ ଥିଲା I
ସୋସିଆଲ ମିଡିଆରେ ପୋଷ୍ଟ ହୋଇଥିବା ଦୁଇ ମିନିଟର ଭିଡିଓରେ ଅଖତର କହିଛନ୍ତି, “ପିଟିଭିରେ ଲାଇଭ ସୋ ଚାଲିଥିବା ବେଳେ ଏକ ଅପ୍ରୀତିକର ଘଟଣା ଘଟିଥିଲା, ଯେଉଁଠାରେ ନାଉମାନ ନିଆଜ ମତେ ସୋ ଛାଡି ଚାଲିଯିବାକୁ କହିଥିଲେ I
ମୁଁ ଜାଣେ ନାହିଁ ସେ କାହିଁକି ଏହା କହିଛନ୍ତି। ସେହି ସୋ ରେ ସେ ମୋ ଭଳି ଜଣେ ଜଣେ ଜାତୀୟ ତାରକାଙ୍କୁ ଅପମାନିତ କରିଥିଲେ ଏବଂ ମୋତେ ଅଣଦେଖା କରିଥିଲେ ବୋଲି ମୁଁ ଅନୁଭବ କଲି I
ସେହି ସୋ ରେ ବହୁ ବଡ ବଡ ପୂର୍ବତନ କ୍ରିକେଟ ଖେଳାଳି ଥିଲେ- ସେମାନଙ୍କ ସାମ୍ନା ରେ ମତେ ଏମିତି ଅଣଦେଖା କରିବାଦ୍ୱାରା, ସେମାନେ କଣ ଭାବିଥିବେ ବୋଲି ଅଖତାର ପ୍ରଶ୍ନ କରିଛନ୍ତି I
“ମୁଁ କୌଣସି ପ୍ରକାରେ ଏହି ସମସ୍ୟାର ସମାଧାନ କରିବାକୁ କହିଥିଲି … କାରଣ ସମାଧାନ ନ ହେଲେ ଆମ ବାର୍ତ୍ତାଳାପ ଭାଇରାଲ ହେବ। ଏକ ନକାରାତ୍ମକ ଚିତ୍ର ବାହାରକୁ ଯିବ I ତେଣୁ, ମୁଁ କଥାଟାକୁ ମଜାରେ ମଜାରେ ସମାଧାନ ଆଡକୁ ନେବାକୁ ଚାହୁଁଥିଲି I ସୋ ରେ ହିଁ ସେ ଦୁଃଖ ପ୍ରକାଶ କରନ୍ତୁ ବୋଲି ମୁଁ କହିଲି-ସେ ତାହା କଲେ ନାହିଁ। ଯେତେବେଳେ ସେ ଦୁଃଖ ପ୍ରକାଶ କଲେ ନାହିଁ- , ମୁଁ ଭାବିଲି ସୋ ଛାଡିବା ମୋ ପାଇଁ ଉଚିତ ହେବ I
