ଡବଲିନ୍: ହାର୍ଦ୍ଦିକ ପାଣ୍ଡ୍ୟା ବିଜୟରୁ ଅନ୍ତର୍ଜାତୀୟ କ୍ରିକେଟରେ ନିଜର ଅଧିନାୟକତ୍ୱ କ୍ୟାରିୟର ଆରମ୍ଭ କରିଛନ୍ତି | ଶନିବାର ଅନୁଷ୍ଠିତ ପ୍ରଥମ ଟି-ଟ୍ୱେଣ୍ଟି ମ୍ୟାଚରେ ଟିମ ଇଣ୍ଡିଆ ୭ ୱିକେଟରେ ଆୟର୍ଲାଣ୍ଡକୁ ହରାଇଛି। ପାଣ୍ଡ୍ୟା ନିଜେ ଉଭୟ ବଲ୍ ଏବଂ ବ୍ୟାଟ୍ ସହିତ ଚମକିଥିଲେ । ସେ ଆୟର୍ଲାଣ୍ଡର ଇନିଂସରେ ଗୋଟିଏ ୱିକେଟ୍ ନେଇଥିଲେ ଏବଂ ପରେ ୧୧ ବଲରେ ଦ୍ରୁତ ୨୪ ରନ୍ ସଂଗ୍ରହ କରିଥିଲେ।
ବର୍ଷା ଯୋଗୁଁ ମ୍ୟାଚ୍ ବିଳମ୍ବରେ ଆରମ୍ଭ ହୋଇଥିଲା ଏବଂ ପ୍ରତି ଇନିଂସ ୧୨ ଓଭରକୁ ହ୍ରାସ କରାଯାଇଥିଲା | ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଆୟର୍ଲାଣ୍ଡ ୪ ୱିକେଟ୍ ହରାଇ ୧୦୮ ରନ୍ କରିଥିଲା। ଦଳ ପକ୍ଷରୁ ହ୍ୟାରି ଟେକ୍ଟର ସର୍ବାଧିକ ୬୪ ରନ୍ ସ୍କୋର କରିଥିଲେ। ଏହାର ଜବାବରେ ଟିମ୍ ଇଣ୍ଡିଆ ୯.୨ ଓଭରରେ ତିନିଟି ୱିକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା। ଦୀପକ ହୁଡା ୨୯ ବଲରେ ୬ଟି ଚୌକା ଓ ୨ଟି ଚକା ସହ ଅପରାଜିତ ୪୭ ରନ୍ କରିଥିଲେ। ଇଶାନ କିଶନ ୨୬ ରନ କରିଥିଲେ। ଏହି ସହଜ ବିଜୟ ସହ ଭାରତ ଦୁଇ ମ୍ୟାଚ୍ ସିରିଜରେ ୧-୦ରେ ଅଗ୍ରଣୀ ହାସଲ କରିଛି । ସିରିଜର ଦ୍ବିତୀୟ ମ୍ୟାଚ୍ ମଙ୍ଗଳବାର ଖେଳାଯିବ ।
ଏହି ମ୍ୟାଚରେ ଉମ୍ରାନ ମଲିକଙ୍କ ଦେଶ ପାଇଁ ଖେଳିବାର ସ୍ୱପ୍ନ ପୂରଣ ହୋଇଥିଲା, ଯଦିଓ ସେ ସେଭଳି କିଛି ଖାସ୍ କରିପାରିନଥିଲେ | ଅନ୍ତର୍ଜାତୀୟ ଟି-୨୦ରେ ଭାରତର ୯୮ତମ କ୍ରିକେଟର ଭାବେ ଖେଳିଥିବା ଉମ୍ରାନଙ୍କୁ ମାତ୍ର ଗୋଟିଏ ଓଭର ବୋଲିଂ କରିଥିଲେ। ଏଥିରେ ସେ ବିନା କୌଣସି ସଫଳତା ସହ ୧୪ ରନ୍ ଦେଇଥିଲେ ।
