ନୂଆଦିଲ୍ଲୀ : ତାଇଓ୍ବାନ ପ୍ରସଙ୍ଗରେ ପୁଣି ଥରେ ଆମେରିକା ଓ ଚୀନ ମୁହାଁମୁହିଁ ହୋଇଛନ୍ତି । ଚୀନ ତାଇଓ୍ବାନ ଉପରେ ଆକ୍ରମଣ କଲେ ଆମେରିକା ସେନା ତାଇଓ୍ବାନକୁ ସହାୟତା କରିବ ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ ଘୋଷଣା କରିବା ଓ ତାହାକୁ ନେଇ ଚୀନର ତୀବ୍ର ପ୍ରତିକ୍ରିୟା ପରେ ସ୍ଥିତି ବିସ୍ଫୋରକ ରୂପ ନେଇଛି ।
ଏଣୁ ଏଠାରେ ପ୍ରଶ୍ନ ଉଠୁଛି ୟୁରୋପ ପରି ଏସିଆ ବି ଏକ ଯୁଦ୍ଧ ଆଡ଼କୁ ମୁହାଁଉଛି କି ? ନିକଟରେ ଚୀନ ରାଷ୍ଟ୍ରପତି ସି ଜିନ ପିଙ୍ଗଙ୍କ ଏକ ଭିଡିଓ ଭାଇରାଲ ହୋଇଥିଲା, ଯେଉଁଥିରେ ସେ ତାଇଓ୍ବାନ ଅଧିକାର ପାଇଁ ପ୍ରସ୍ତୁତ ରହିବାକୁ ଚୀନ ସେନାକୁ ନିର୍ଦ୍ଦେଶ ଦେଉଛନ୍ତି । ଏହା ପରେ ତାଇଓ୍ବାନକୁ ନେଇ ଆଶଙ୍କା ବଢିଯାଇଛି । ପୁଣି ତାଇଓ୍ବାନକୁ ରକ୍ଷା କରିବାକୁ ବାଇଡେନଙ୍କ ଖୋଲାଖୋଲି ଘୋଷଣା ଏକ ଜଟିଳ ସ୍ଥିତି ଆଡ଼କୁ ନିର୍ଦ୍ଦେଶ କରୁଛି ।
