ଫେବୃଆରୀ ୨୦
ବର ସମେତ ନଅ ଜଣଙ୍କୁ ନେଇ ଯାଉଥିବା ଏକ କାର ରବିବାର ରାଜସ୍ଥାନର କୋଟା ନିକଟବର୍ତ୍ତି ଚମ୍ବଲ ନଦୀରେ ଖସିପଡିଛି। ଏହି ଦୁର୍ଘଟଣାରେ ସମସ୍ତେ ମୃତ୍ୟୁବରଣ କରିଛନ୍ତି |
କୋଟାର ନୟାପୁରା ନିକଟରେ ଏକ ଛୋଟ ପୋଲ ନିକଟରେ ଏହି ଘଟଣା ଘଟିଛି | ସୂଚନା ପାଇବା ପରେ ସରକାରୀ କର୍ମୀ ଏବଂ ପୋଲିସ ଘଟଣାସ୍ଥଳରେ ପହଞ୍ଚି ପ୍ରାୟ ଦୁଇ ଘଣ୍ଟା ଧରି ଉଦ୍ଧାର କାର୍ଯ୍ୟ କରିଥିଲେ। ନଦୀରେ ବୁଡ଼ିଯାଇଥିବା ସମସ୍ତଙ୍କ ମୃତଦେହକୁ ବାହାର କରାଯାଇଛି I
ସୂଚନା ଅନୁଯାୟୀ ଡ୍ରାଇଭର ଖୁବ ଦ୍ରୁତ ଗତି ରେ ଗାଡି ଚଳାଉଥିଲା। କଲଭର୍ଟରେ ପହଞ୍ଚିବା ପରେ କାରଟି ନିୟନ୍ତ୍ରଣ ବାହାରକୁ ଯାଇ ଚମ୍ବଲ ନଦୀରେ ଖସିପଡିଥିଲା। ସେତେବେଳେ କଲଭର୍ଟ ଦେଇ ଯାଉଥିବା ଜଣେ ଯାତ୍ରୀ କାରଟି ନଦୀ ଭିତରକୁ ପଡୁଥିବାର ଦେଖି ସେ ପୋଲିସକୁ ସୂଚନା ଦେଇଥିଲେ। ଯାତ୍ରୀ ଜଣକ ଙ୍କ କହିବା ଅନୁଯାୟୀ କାର ଦ୍ରୁତ ଗତି ରେ ଆସୁଥିଲା I
ସୂଚନାନୁସାରେ, ବର ଅବିନାଶ ଙ୍କ ସହ ଅନ୍ୟ ୭ ଜଣ ବରଯାତ୍ରୀ ଏହି କାର ରେ ଉଜ୍ଜୟିନୀ ଯାଉଥିଲେ I ଅନ୍ୟ ଏକ ବସ ରେ ପ୍ରାୟ ୭୦ ଜଣ ବରଯାତ୍ରୀ ଥିଲେ I ବସ ଓ କାର ଶନିବାର ରାତି ୨ ଟା ରେ ଚାଉଥ କା ବାରୱାଡା ରୁ ଉଜ୍ଜୟିନୀ ଅଭିମୁଖେ ବାହାରିଲେ I ବାଟରେ ସମସ୍ତେ ଚା ’ପିଇବା ପାଇଁ ଏକ ଦୋକାନରେ ଅଟକି ଗଲେ | ସେଠାରୁ ବସ୍ ଆଗକୁ ବାହାରିଗଲା | ଯେତେବେଳେ ବସ୍ ବହୁତ ଦୂର ଗଲା, ବରର ବାପା ଅନୁଭବ କଲେ ଯେ କାରଟି ତାଙ୍କଠାରୁ ବହୁତ ଦୂରରେ | ଏହା ଉପରେ ସେ କାରରେ ଥିବା ଲୋକଙ୍କୁ ଫୋନ ମାଧ୍ୟମ ରେ ସମ୍ପର୍କ କରିବାକୁ ଚେଷ୍ଟା କରିଥିଲେ ମଧ୍ୟ କାହା ସହ କଥା ହୋଇପାରିନଥିଲେ।
ଏହା ପରେ ସେ ବସ୍ କୁ ଅଟକାଇ କାର୍ ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ କହିଥିଲେ | ଏହି ସମୟରେ, କାରରେ ଥିବା ରୋଶନଙ୍କ ପକେଟରେ ଉଦ୍ଧାରକାରୀ ଦଳ ପରିଚୟ ପତ୍ର ପାଇଲେ ଏବଂ ସେହି ଆଧାର ରେ ସେମାନେ ସମସ୍ତେ ଚାଉଥ କା ବାରୱାଡାର ବାସିନ୍ଦା ବୋଲି ଜଣା ପଡିଥିଲା। ପୋଲିସ ବରର ବାପାଙ୍କୁ ଡାକି ଦୁର୍ଘଟଣା ସମ୍ପର୍କରେ ସୂଚନା ଦେଲେ । ଏହି ଦୁର୍ଘଟଣା ସକାଳ 5.୩୦ ସମୟରେ ଘଟିଥିବା କୁହାଯାଉଛି।
ବରଯାତ୍ରୀ ରାଜସ୍ଥାନର ବାରୱାରା ଠାରୁ ଉଜ୍ଜୟିନୀ ମଧ୍ୟରେ ଥିବା ଭେରିନେଲା ଅଞ୍ଚଳର ଏକ ଗାଁ କୁ ଯାଉଥିଲା I ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଗୋଟିଏ ପରିବାର ର ତିନି ଭଉଣୀଙ୍କ ର ଗୋଟିଏ ଦିନରେ ବାହାଘର ହେଉଥିଲା I ସବା ସାନ ଝିଅ ର ବାହାଘର ଅବିନାଶ ଙ୍କ ସହ ହେବାର ଥିଲା I
