ମୁମ୍ବାଇ: ଗୁରୁବାର ମୁମ୍ବାଇ ପୋଲିସର ଆଣ୍ଟି ନାର୍କୋଟିକ୍ସ ସେଲ୍ କୋଟି କୋଟି ଟଙ୍କାର ଏକ ଡ୍ରଗ୍ସ ରାକେଟ ଧରିବାରେ ସଫଳ ହୋଇଛି। ବେଆଇନ ଡ୍ରଗ୍ସ ବିକ୍ରି ଅଭିଯୋଗରେ ମୋଟ୍ ୫ ଜଣଙ୍କୁ ଗିରଫ କରିଛି ପୋଲିସ। ସେମାନଙ୍କଠାରୁ ୭୦୪ କିଲୋଗ୍ରାମ ଡ୍ରଗ୍ସ ଜବତ ହୋଇଛି । ଯାହାର ମୂଲ୍ୟ ପ୍ରାୟ ୧୪୦୦ କୋଟି ଟଙ୍କା। ସୋସିଆଲ ମିଡିଆ ଜରିଆରେ ଡ୍ରଗ୍ସ ବିକ୍ରି କରାଯାଉଥିବା ସୂଚନା ମିଳିଛି।
ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ, ମୁଖ୍ୟ ଅଭିଯୁକ୍ତ ଉତ୍ତରପ୍ରଦେଶର ପ୍ରବୀଣ କୁମାର। ୫୧ ବର୍ଷୀୟ ପ୍ରବୀଣ ଚାରି ଜଣଙ୍କ ସହିତ କୋଟି ଟଙ୍କା ମୂଲ୍ୟର ଏହି ରାକେଟ ଚଳାଉଥିଲା। ଏହି ଚାରି ଅଭିଯୁକ୍ତ ଶ୍ୟାମସୁଲ୍ଲା ଖାନ, ଆୟୁବ ଖାନ, ରିୟାଜ ମେମୋନ ଏବଂ ରିୟାଜଙ୍କ ଗର୍ଲଫ୍ରେଣ୍ଡ ରେଶମା ଚନ୍ଦନ । ଏମାନେ ଡ୍ରଗ୍ସ ସାମଗ୍ରୀ ଯୋଗାଉଥିଲେ ଏବଂ ପ୍ରବୀଣଙ୍କ ଠାରୁ ବହୁ ପରିମାଣରେ ଡ୍ରଗ୍ସ କିଣି ବିକ୍ରି କରୁଥିଲେ।
ପ୍ରବୀଣ ପୂର୍ବାଞ୍ଚଳ ନାମକ ବିଶ୍ୱବିଦ୍ୟାଳୟରୁ ଅର୍ଗାନିକ କେମେଷ୍ଟ୍ରିରେ ପିଜି କରିଥିଲେ। ୧୯୯୭ରେ ସେ ମୁମ୍ବାଇର ନାଲାସୋପାରାରେ ରହୁଥିଲେ। ଏଠାରେ ସେ ଏକ ଫାର୍ମା କମ୍ପାନୀରେ ମାର୍କେଟିଂ କାମ କରିଥିଲେ। ୧୫ ବର୍ଷ କାମ କରିବା ପରେ ସେ ଡ୍ରଗ୍ସ ବିକ୍ରି କରିବା ଆରମ୍ଭ କରିଥିଲେ। ତା’ପରେ ସେ ସେଠାରେ ଏକ ଜାଗାକୁ ଲିଜରେ ନେଇ ଏକ କେମିକାଲ ୟୁନିଟ୍ ତିଆରି କରି ବହୁ ସଂଖ୍ୟାରେ ଡ୍ରଗ୍ସ ତିଆରି କରିବା ଆରମ୍ଭ କଲେ। ଦୁଇ ବର୍ଷରେ ସେ ୧୨୦୦ କିଲୋଗ୍ରାମରୁ ଅଧିକ ମୂଲ୍ୟର ଡ୍ରଗ୍ସ ବିକ୍ରି କରି ୨୦ କୋଟି ଟଙ୍କା ରୋଜଗାର କରିଥିଲେ। ଉତ୍ତରପ୍ରଦେଶ ଏବଂ ଗୁଜୁରାଟରେ ମଧ୍ୟ ସେ ସମ୍ପତ୍ତି କିଣିଛନ୍ତି। ପ୍ରବୀଣ ପାଲଘର ଏବଂ ଅମ୍ବରନାଥରେ ଡ୍ରଗ୍ସ ୟୁନିଟରେ କାମ କରନ୍ତି।
ଏହି ପ୍ରସଙ୍ଗରେ ସୂଚନା ଦେଇ ଜଣେ ଅଧିକାରୀ କହିଛନ୍ତି ମାର୍ଚ୍ଚରେ ପ୍ରବୀଣଙ୍କଠାରୁ ଡ୍ରଗ୍ସ ନେଉଥିବା ଜଣେ ବିକ୍ରେତାଙ୍କ ବିଷୟରେ ପୋଲିସ ଏକ ସୂଚନା ପାଇଥିଲା। ତା’ପରେ ଆଣ୍ଟି ନାର୍କୋଟିକ୍ସ ସେଲର ୱର୍ଲି ୟୁନିଟ୍ ମାନସୁର୍ଡରେ ଜାଲ ପକାଇ ଶାମସୁଲ୍ଲାଙ୍କୁ ୨୫୦ ଗ୍ରାମ ଡ୍ରଗ୍ସ ସହିତ ଗିରଫ କରିଥିଲା। ପଚରାଉଚରା ବେଳେ ପୋଲିସ ତାଙ୍କ ଗୁରୁ ଆୟୁବ ଏବଂ ପରେ ରେଶମାଙ୍କ ନିକଟରେ ପହଞ୍ଚିଥିଲା। ଏହାପରେ ତଦନ୍ତ ବେଳେ ରେଶମାଙ୍କ ପ୍ରେମିକା ରିୟାଜଙ୍କ ବିଷୟରେ ପୋଲିସ ଜାଣିବାକୁ ପାଇଥିଲା। ଦୀର୍ଘ ଦିନ ଧରି ପଚରାଉଚରା କରିବା ପରେ ରିୟାଜ ପ୍ରବୀଣଙ୍କ ବିଷୟରେ ସବୁକିଛି କହିଥିଲେ। ସୂଚନାନୁସାରେ, ଏନଡିପିଏସ୍ ଆକ୍ଟ ଅନୁଯାୟୀ ସମସ୍ତ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ ହୋଇଛି। ପୋଲିସ ତଦନ୍ତ ଆରମ୍ଭ କରିଛି।
