କୋଲକାତା: ପଶ୍ଚିମବଙ୍ଗ ବିଧାନସଭାରେ ବିରୋଧୀ ଦଳର ନେତା ତଥା ବିଜେପିର ବରିଷ୍ଠ ନେତା ଶୁଭେନ୍ଦୁ ଅଧିକାରୀ ମମତା ସରକାର ଭାଙ୍ଗିଯିବ ବୋଲି ବଡ଼ ବୟାନ ଦେଇଛନ୍ତି। ଶୁଭେନ୍ଦୁ ଅଧିକାରୀ କହିଛନ୍ତି ଯେ ଚଳିତ ବର୍ଷ ଡିସେମ୍ବର ସୁଦ୍ଧା ମମତା ସରକାର ଭାଙ୍ଗିଯିବ। କେବଳ ଏତିକି ନୁହେଁ, ୨୦୨୪ରେ ହେବାକୁ ଥିବା ଲୋକସଭା ନିର୍ବାଚନ ସହିତ ରାଜ୍ୟରେ ବିଧାନସଭା ନିର୍ବାଚନ ମଧ୍ୟ ଅନୁଷ୍ଠିତ ହେବ ବୋଲି ଶୁଭେନ୍ଦୁ ଅଧିକାରୀ ଦାବି କରିଛନ୍ତି। ଶୁଭେନ୍ଦୁ ବାରମ୍ବାର ଏପରି ବୟାନ ଦେଉଥିବାରୁ ପଶ୍ଚିମବଙ୍ଗ ରାଜନୀତି ମଧ୍ୟ ସରଗରମ ରହିଛି।
ବେଙ୍ଗଲରେ ବଡ଼ ଘୋଟାଲା ହୋଇଛି ବୋଲି ଶୁଭେନ୍ଦୁ ଅଧିକାରୀ କହିଛନ୍ତି। ଆର୍ଥିକ ଦୃଷ୍ଟିରୁ ରାଜ୍ୟ ସରକାର ଦେବାଳିଆ ହୋଇପଡିଥିବା ବେଳେ ଆଇନ ଶୃଙ୍ଖଳା ଭାଙ୍ଗି ପଡିଛି। ଯେପରି ଆୟରୁ ଅଧିକ ସମ୍ପତ୍ତି ଗୁଡିକର ପୁନରୁଦ୍ଧାର ହେଉଛି ଏବଂ କୋର୍ଟର ନିଷ୍ପତ୍ତି ଆସୁଛି ତାକୁ ଦେଖିଲେ ଲାଗୁନାହିଁ ଯେ ଏହି ସରକାର ଡିସେମ୍ବର ପର୍ଯ୍ୟନ୍ତ ଚାଲିବ। ମମତା ସରକାର ଭାଙ୍ଗିଗଲା ପରେ ବିଜେପି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ସରକାର ଗଢିବ ବୋଲି ସେ କହିଛନ୍ତି।
ଇକୋନୋମିକ୍ ଟାଇମ୍ସକୁ ପ୍ରତିକ୍ରିୟା ଦେଇ ଟିଏମସି ସାଂସଦ ତଥା ମୁଖପାତ୍ର ସୁଖେନ୍ଦୁ ଶେଖର କହିଛନ୍ତି ଯେ ଦେଶରେ ଭାରତୀୟ ଜନତା ପାର୍ଟି ଖେଳୁଥିବା ଖେଳ ବେଙ୍ଗଲରେ ଚାଲିବ ନାହିଁ। ସରକାରକୁ ଭାଙ୍ଗିବାକୁ ବିଜେପିକୁ ପାଣି ପରି ଟଙ୍କା ବୋହିବାକୁ ପଡିବ । କିନ୍ତୁ ସମୟକୁ ଅପେକ୍ଷା କର, ଗୋଟିଏ ଦିନ ଆସିବ ଯେତେବେଳେ ବିଜେପି ଆଉ ରହିବ ନାହିଁ।
ଉଲ୍ଲେଖଯୋଗ୍ୟ, ଶିକ୍ଷକ ନିଯୁକ୍ତ ଘୋଟାଲାରେ ଟିଏମସି ନେତା ତଥା ମନ୍ତ୍ରୀ ପାର୍ଥ ଚାଟାର୍ଜୀ ଏବଂ ସହଯୋଗୀ ଅର୍ପିତା ମୁଖାର୍ଜୀ ଜେଲ୍ ଯାଇଛନ୍ତି। ଏହି ମାମଲାରେ ମମତା ବାନାର୍ଜୀଙ୍କ ଭାବମୂର୍ତ୍ତି ପ୍ରଭାବିତ ହୋଇଛି। କୁହାଯାଉଛି ଏହି ମାମଲାରେ ୧୦୦ରୁ ଅଧିକ ଟିଏମସି ନେତା ସାମିଲ ରହିଛନ୍ତି ବୋଲି ଏକ ତାଲିକା ଶୁଭେନ୍ଦୁ ଅଧିକାରୀ ଗୃହମନ୍ତ୍ରୀ ଅମିତ ଶାହଙ୍କୁ ଭେଟି ଦେଇଛନ୍ତି ବୋଲି କୁହାଯାଉଛି।
